JAMHURI YA MUUNGANO WA TANZANIA

WIZARA YA MAWASILIANO NA TEKNOLOJIA YA HABARI MAMLAKA YA MAWASILIANO TANZANIA

ISO 9001:2015 CERTIFIED

TAARIFA KWA UMMA

Mamlaka ya Mawasiliano Tanzania (TCRA) ilianzishwa kwa mujibu wa Sheria ya Mamlaka ya Mawasiliano Tanzania Na. 12 ya Mwaka 2003. Mamlaka ya Mawasiliano Tanzania ina jukumu la kusimamia na kudhibiti Sekta ya Mawasiliano inayojumuisha Utangazaji, Posta, Simu na Intaneti.

Kwa masuala ya utangazaji, Mamlaka ya Mawasiliano Tanzania inatekeleza majukumu yake kwa upande wa Tanzania Bara tu. Kifungu cha 26 (2) cha Sheria ya TCRA Na. 12 ya mwaka 2003 kinampa mamlaka Waziri mwenye dhamana ya Utangazaji uwezo wa kuteua Wajumbe wa Kamati ya Maudhui. Kamati inatakiwa kuwa na Wajumbe wasiozidi watano akiwemo Mjumbe mmoja wa Bodi ya Wakurugenzi wa TCRA ambaye atakuwa ni Mwenyekiti na Wajumbe wengine wanne

(4) huteuliwa na Waziri mwenye dhamana ya Utangazaji kwa kushauriana na Mwenyekiti wa Bodi ya TCRA. Wajumbe wa Kamati ya Maudhui hawatakiwi kuwa waajiriwa wa TCRA au mashirika ya Utangazaji.

Maombi ya nafasi moja (1) yanakaribishwa kwa Mtanzania yeyote mwenye sifa na ujuzi stahiki wa kuteuliwa kuwa Mjumbe wa Kamati ya Maudhui.

SIFA ZA MWOMBAJI

Ili aweze kuteuliwa kuwa Mjumbe wa Kamati ya Maudhui, muombaji lazima awe na sifa zifuatazo:

(a)  Awe mhitimu wa elimu ya Chuo Kikuu kinachotambulika;

(b)  Awe mzoefu angalau wa miaka kumi katika moja au zaidi kwenye Usimamizi, Sheria, Uchumi, Fedha, Uhandisi, Teknolojia ya Mawasiliano ya Habari, Utangazaji, Mawasiliano au Utamaduni;

(c)  Awe na elimu/ujuzi katika Sekta ya Utangazaji;

(d)  Kutimiza matakwa ya kutokuwa na mgongano wa kimaslahi chini ya kifungu cha 11 cha Sheria ya TCRA, 2003 na hatakuwa na maslahi ya kifedha au mengine yeyote ambayo yanaweza kuleta uwezekano mkubwa wa kuathiri utekelezaji wa kazi zote chini ya Sehemu hii;

(e)  Awe na nia ya kutumika kama Mjumbe;

(f)  Awe mwenye uwezo wa kuhakikisha kwamba uteuzi wake ni kwa ajili ya kuwakilisha maslahi na maoni ya watu wanaoishi katika maeneo mbalimbali ya nchi; na

(g)  Awe mwenye uwezo wa kutekeleza majukumu na wajibu kwa ufanisi na uaminifu.